Aprobado o proxecto para restaurar ata 12.000 metros cadrados da contorna dos ríos Sar, Sarela e Vilar

Prosegue a restauración ambiental de zonas próximas aos ríos que atravesan Compostela. A Xunta de Goberno Local aprobou onte o proxecto básico para acondicionar ata 12.050 metros cadrados da contorna do Sar, Sarela e Vilar, unha actuación para a que se destinarán 341.590,13 euros. Os traballos levaranse a cabo entre as zonas da Rocha e Vidán, baixo o viaducto da AC-543.

O alcalde, Xosé Sánchez Bugallo, explicou que se está “cun labor de recuperación das contornas dos ríos Sar e Sarela e da súa posta en valor”. Agora mesmo “están en execución as sendas peonís a carón do río Sar que en principio chegan ata o Polígono da Sionlla, aínda que neste momento están cortadas polas obras do orbital”, co obxectivo, engadiu, “de sumalos á senda peonil que vai unir os concellos de Santiago, Oroso, ata Cerceda”. Ademais, tamén están en execución na zona de Conxo e na zona que vai desde O Milladoiro ata o Castelo da Rocha. “O que sacamos a licitación é o acondicionamento da contorna e das sendas peonís” nas ribeiras do Sar, no tramo que vai desde o Castelo da Rocha ata a conexión co río Sarela”, explicou. Esto permitirá, subliñou, “unir xa as actuais sendas peonís que veñen polo Sarela da zona da Peregrina co Sar ata o cruce do orbital e ata Milladoiro”. En total serán “case 30 quilómetros de lonxitude, que tería este circuíto,con isto quedarían conectados os dous tramos”, rematou.

La ruta senderista del Berce do Sar que conecta con la de Brañas do Sar, abierta al público

O ámbito de actuación comprende o acondicionamento e restauración ambiental dun espazo situado baixo o viaduto da AC-543 (avda. de Xosé Filgueira Valverde) sobre o río Sarela, en Vidán que se divide en dúas zonas: ámbito sur (Sar e Vilar), entre o xacemento arqueolóxico do Castelo da Rocha Forte e o tramo do Camiño portugués, paralelo ao río Sar entre a Ponte Vella de Arriba e o viaduto da Rocha; e o ámbito norte, que comprende o acondicionamento e restauración ambiental do espazo situado baixo o viaduto da AC-543, aos dous lados do Sarela.

Accesibilidade

Entre os obxectivos concretos deste proxecto figuran, ademais da recuperación ambiental; a solución dos problemas de accesibilidade mediante sendas e pontes; a creación de zonas de lecer e descanso; e a implantación de recursos de comunicación para contribuír á revalorización do espazo a recuperar.

As mellores sendas naturais para percorrer o Santiago máis verde

A proposta do ámbito norte consiste en crear unha conexión entre a rúa superior e o río mediante unha serie de espazos de estancia e cunha pequena ponte peonil que conecte coa outra beira. En canto ao proxecto do ámbito sur, inclúe as seguintes actuacións: o acondicionamento da zona situada entre a entrada ao xacemento da Rocha Forte e a vía férrea; a creación dun pequeno aparcadoiro de servizo no terreo municipal situado entre a rúa do Piñeiro e a vía férrea; o acondicionamento do paso subterráneo baixo a vía do tren; o acondicionamento da carballeira situada ao oeste do xacemento arqueolóxico; a construción dunha senda peonil, próxima ao curso do regato do Vilar, entre o paso subterráneo e o río Sar; a construción dunha pasarela peonil para o paso sobre o Sar, xunto á súa confluencia co regato do Vilar; a continuación da senda, paralela ao Sar, ata atoparse co Camiño de Santiago Portugués; a recuperación da vexetación de ribeira dos cursos do regato do Vilar e do río Sar, na zona comprendida entre a vía férrea e o encontro co Camiño Portugués.