Raxoi prepara o dispositivo de seguridade para o festival, con 40.000 persoas por xornada

A Xunta local de Seguridade reuniuse na mañá de onte para coordinar o dispositivo de control no festival O Son do Camiño, que se celebrará os días 15, 16 e 17 de xuño no Monte do Gozo e para o que se agardan máis de 40.000 espectadores cada día do evento.

Xunta e Concello traballarán en conxunto para garantir os controis de acceso ao festival, así como a seguridade no interior do recinto e reforzaranse os servizos de transporte, tanto ferroviario coma urbano nos días do festival. Ademais, explicaron logo da xuntanza, reservaranse aparcamentos disuasorios en San Lázaro e no Multiúsos Fontes do Sar.

Desconvocada a folga no transporte urbano de Santiago

Desde o Concello de Santiago, que está adherido ao sistema Vioxén de seguemento integral da violencia machista, promovido polo Ministerio de Igualdade, instarase ás empresas organizadoras, EsmerArte & Old Navy, a instalar no espazo do festival puntos violeta. Espazos destinados a informar sobre a violencia contra as mulleres e os colectivos LGTBI+ e que buscan ser lugar seguro no caso de que se produza algún abuso.

Bizarrap, Alt-J, Leiva, Maluma, The Kooks, Mora, Aitana, Royal Blood ou Duki son algúns dos cabezas de cartel desta IV edición de O Son do Camiño, que este ano incorpora unha serie de novidades, entre elas a instalación dunha noria de 30 metros de altura e capacidade para 96 persoas, situada de tal xeito que os que suban á atracción terán unha visión panorámica de todo o espazo do festival. Desde a organización agárdase que este feito impulse un interesante movemento nas redes sociais do público asistente. Xunto ás figuras internacionais estarán tamén artistas galegos como Xoel López, Fillas de Cassandra, Galician Army ou Sila Lúa.