Santiago recupera o turismo de congresos cunha decena de eventos en setembro

Os congresos, feiras e xornadas de traballo gañan forza como motores turísticos na capital galega. Hai unha década estas citas xa supoñían unha importante fonte de facturación do sector, pero o seu peso reduciuse coa chegada da pandemia. Dende o ano pasado, a actividade congresual en Santiago volveu a recuperar importancia.

A previsión é que o ano 2023 sexa un grande ano para o sector congresual da cidade, apuntalando a desestacionalización da demanda na cidade. Nos seis primeiros meses do ano houbo múltiples eventos que dinamizaron a demanda turística da cidade: como o oitavo Symposium internacional de Biopsia Líquida, que se celebrou no mes de xaneiro; a Conferencia Mundial da Educación, no mes de febreiro; o quinto Congreso Nacional da Asociacion Interim Management, en marzo; as Trixésimas Xornadas de Publicidade Exterior, no mes de abril; e en maio o 50 Congreso Nacional de Dermatoloxía e Veneroloxía, con máis de 2.000 participantes e máis de 1.000 acompañantes. Xa no mes de xuño, celebrouse o Congreso da Sociedade Española de Enfermedades Infecciosas e Microbioloxía Clínica (SEIMC).

Dende a oficina da Santiago Convention Bureau, servizo municipal pertencente a Turismo de Santiago, sinalan que o sector congresual volverá a coller forza tras o verán. Así por exemplo en setembro celebraranse o “XIII Congreso da Sociedade Española de Psicofisioloxía e Neurociencia Cognitiva e Afectiva (SEPNECA), do 7 ao 9 de setembro, o “ Congreso da Sociedade Española de Ortodoncia”, un cumio de ministros da Unión Europea e Latinoamérica e unha reunión do Consello de Asuntos Económicos e Financeiros da Unión Europea, do 15 ao 16 de setembro, no marco da presidencia española da UE, e o “II Congreso de Alineadores y Nuevas Tecnologías”, do 22 ao 23 de setembro, con 1.500 participantes estimados.

A éstas súmanse outros eventos como Suitma 12 th Conference on Soils of Urban, Industrial, Traffic, Mining and Military Areas; EUROFI Finacial Forum; NAFO 45 th Annual Meeting (Northwest Atlantic Fisheries) ou o CKM 2023: 12 th Internacional Workshop on the CKM Unitarity Triangle.

No mes de outubro tamén hai previstos catro grandes congresos vinculados co sector sanitario, que axudarán a prolongar a temporada turística xa no outono. Son o “XIX Congreso Nacional de Neonatología y Medicina Perinatal”, o “IX Congreso Nacional de Enfermería Neonatal”, o “IX Congreso de la Sociedad Española de Epilepsia” e o “34º Congreso Nacional de la Sociedad Española de Alergología e Inmunología Clínica”.

Dende Turismo de Santiago manifestan a este medio que estas só son algunhas das citas programadas “máis relevantes” para as cales fan un seguimiento e ás que se irán sumando outras no momento en que estean confirmadas.

Este tipo de turismo axuda aos hoteis a alcanzar un dos seus grandes obxectivos: desestacionalizar a demanda e que a influencia de viaxeiros non se centre unicamente nos meses de verán, festivos, fins de semana ou pontes. Isto vai unido a que o propio sector observa con preocupación que nos últimos anos ese gasto por viaxeiro diminuíu, especialmente nos meses de verán, onde o perfil é distinto ao do visitante que acode a Santiago por motivos profesionais.

Aposta polo sector dende Raxoi

A concelleira de Capital Cultural e Turismo, Miriam Louzao, afirma en conversa con este medio que o 2023 está sendo “un gran ano” para o sector de congresos, o que considera “fundamental para o modelo turístico da cidade” que aposta pola “sostibilidade e a convivencia coa veciñanza”. Isto dase grazas a que os congresos e outros encontros de carácter profesional “serven para desestacionalizar a demanda turística” Louzao define a este público como “respectuoso co patrimonio e cos lugares nos que se celebran os eventos”, ademais do punto a favor relativo a que o seu gasto “é superior ao do turista tradicional”.

O obxectivo xa de cara a vindeiros anos, en palabras da edila, é “manter e mellorar o turismo de negocios e internacionalizalo” co fin de chegar a un mercado estratéxico como pode ser Estados Unidos.