A furgoneta de campaña do PP rompe o letreiro dun kebab e Verea remata comendo un durum

Un dos vehículos da campaña de Borja Verea estampouse hoxe contra o letreiro dun restaurante da rúa Rosalía de Castro. O rótulo do local, o Ali Baba Turkish Kebab, quedou torto a causa do impacto dos altofalantes da furgoneta. O momento capturouno Salseo USC, a conta de instagram dirixida ao estudantado, que subiu a foto do incidente ás súas stories e que despois compartiu Borja Verea nas súas redes sociais.

O condutor do vehículo accidentado deixou o contacto do partido no establecemento para que o seguro se faga cargo do desperfecto, pero o propietario alegou en todo momento que "non era necesario, que el se facía cargo". Segundo explican fontes do partido, o candidato popular chamouno persoalmente para aclarar o acontecido e insistir no pagamento dos desperfectos.

Ante a reiterada negativa do dono, que respondeu que "era unha tontería e que xa o arreglaría el", Borja Verea acudiu comer ao restaurante turco. Alí deu conta dun dos pratos típicos de Oriente Medio e o Mediterráneo oriental elaborado con anacos de carne, peixe e/ou vexetais cociñados á grella ou ao espeto. Durante a visita ao local tamén aproveitou para continuar coa campaña subindo unha réplica ás súas redes en formato vídeo para afirmar: «Nós sí damos un durum por Compostela»