O corte ao tráfico da Pastoriza causa conxestións de vehículos na avenida de Coímbra e en Xoán XXIII

Ao mediodía de onte, na confluencia entre a avenida de Coímbra e a avenida Xoán XXIII, era visible a conxestión circulatoria derivada das obras de mellora da Pastoriza, cortada ao tráfico dende este luns e cuxo tráfico se desviou por estas rúas, así como as liñas e paradas de buses urbanos que circulaban entre San Caetano e Santa Clara a través da rúa dos Basquiños.

Así comezaba a primeira das 12 semanas (tres meses) nas que está previsto que se finalicen as obras de mellora da mobilidade e da accesibilidade na área oeste do barrio da Almáciga, cunha importante conxestión de tráfico nas vías que conectan a cidade histórica, San Caetano e o campus norte. Vehículos particulares, transporte público e autobuses escolares obrigaron nas horas centrais do día a que a Policía Local dirixise o tráfico na zona. Unha situación que o concelleiro de Mobilidade, Xan Duro, considera que se resolveu “con relativa fluidez” grazas á actuación da Policía Local. Duro estima que son circunstancias normais no comezo dunhas obras e que todo se regulará “unha vez que a xente se afaga aos novos itinerarios”. Unhas rutas que só poderán mudar os vehículos particulares en función de cara a onde se dirixan, a concentración das liñas de buses non pode evitarse “xa que teñen que dar servizo a todas as paradas eliminadas”, explica Xan Duro, que recalca que desta maneira “tan só se perde unha parada, a da rúa dos Basquiños”, e séguese mantendo operativa a de Santa Clara.

Los comerciantes de Pastoriza temen que las obras que arrancan el lunes resten clientela

Estas obras de mellora xa molestaron os negocios da Pastoriza antes de comezaren, por temor á perda de clientes (bares que se viron obrigados a retirar as terrazas) e complicacións cos servizos de reparto. Xan Duro afirma que dende o goberno “non podemos máis que desculparnos polas incomodidades que sempre supoñen as obras”, mais tamén apuntou que o Concello estará “vixiante” para se cumpra o prazo de tres meses na execución dunha obra que ten un orzamento de 331.735,79 euros e afecta unha área de 1.250 metros cadrados.

O obxectivo é recuperar esta rúa de entrada á cidade para o uso peonil, como acontecía antes de que a mediados do século pasado se convertese en travesía urbana. Neste sentido, tamén apunta que toda incomodidade “se verá compensada unha vez rematados os traballos tal e como vai quedar a rúa”.

As obras, previstas para o pasado xoves día 14, adiáronse até o luns por recomendación dos corpos de seguridade da cidade ante a chegada á capital dos ministros de Economía da UE (Unión Europea), Latinoamérica e Caribe para participar no encontro informal Ecofin.