Bugallo aposta por destinar o 50 % do recadado pola taxa turística a políticas de rehabilitación e vivenda na zona vella

Coa nova Lei de Vivenda no centro do debate político, o alcalde de Santiago e candidato a reelección nas eleccións municipais do 28 de maio indicou que o 50 % do recadado coa posta en marcha da taxa turística destinaríase a políticas de rehabilitación e vivenda, “poñendo o foco no casco histórico para facilitar a fixación de poboación”. É unha das propostas electorais de Xosé Sánchez Bugallo, que tendo en conta que no estudo elaborado pola Universidade de Santiago (USC) para o Concello estímase un ingreso aproximado de 2.625.000 euros, suporía máis de 1.300.000 € dirixidos a programas de axudas e impulso a recuperación dos edificios da zona vella. Con todo, para implementar unha taxa deste tipo é necesario que o Parlamento de Galicia autorice aos municipios aplicar este imposto. Co informe da USC xa enriba da mesa, a intención do actual goberno local é presentar canto antes a proposta en San Caetano. 

Santiago ingresaría casi tres millones de euros anuales con la tasa turística

O alcalde explicou que con esta partida reforzaríase o papel do Consorcio, que “nos últimos anos viu reducido o seu poder de intervención neste sentido, motivado polo escaso compromiso da Xunta de Galicia en materia de financiación”. “Temos que requirir a todas as administracións que se impliquen, e nós os primeiros”, recalcou. O informe elaborado pola USC tamén precisa a cuantía económica da taxa, que tamén abarcaría os aloxamentos en pisos turísticos, e oscilaría entre os 0,5 euros de mínima e os 2,5 € de máxima por día, cun límite de seis xornadas.

La Praza de Abastos del ‘futuro’ podría albergar un supermercado

Ademais de subliñar a importancia de aplicar unha taxa turística en Compostela, Sánchez Bugallo tamén incidiu no debate organizado polo Ateneo o importante papel que tivo a zona monumental nos seus anteriores mandatos. “Traballamos para preservar ese carácter vivo e habitado, conseguindo servizos, como foi o Centro de Saúde, e creando aparcadoiros en toda a periferia da cidade histórica”, destacou o rexedor compostelán, antes de lembrar que cando comezou o actual periodo de goberno, “as asociacións veciñais esixían fibra óptica no casco histórico, a peonalización de Mazarelos e un Centro Sociocultural”, tres cuestións, dixo Sánchez Bugallo, que “xa están feitas”, ao igual, engadiu, que a retirada da compactadora de Fonseca, “outra vella demanda que cumpriu este goberno creando un novo sistema de recollida de lixo incluíndo a separación por franxas na zona vella”.

Cara ao futuro, na lista de prioridades para o candidato socialista destaca “a actualización do Plan Especial da Cidade Histórica para dotalo cun marco lexislativo novo”, co obxectivo, dixo, de “poñer as cousas máis fáciles a quen quere recuperar un inmoble e quere vivir no centro histórico de Compostela” explicou o alcalde, que insistiu ademais en que esa revisión debe estar encamiñada a preservar como uso principal o residencial. “Nós, claramente, apostamos por unha cidade histórica habitable e habitada, con servizos, con veciñas e veciños que atopen na zona vella unha cidade con vida”, defende o alcalde.