Galicia conta cun novo símbolo nacional: o Panteón de Galegas e Galegos Ilustres

O Parlamento de Galicia aprobou na mañá deste venres por unanimidade a Proposición de Lei do Panteón de Galegas e Galegos Ilustres mediante lectura única, presentada ao Pleno previo acordo dos tres grupos parlamentarios, e polo que o espazo da Igrexa de San Domingos de Bonaval pasará á xestión pública a través dunha Fundación dependente do Parlamento de Galicia. Nunha sesión que o presidente do hemiciclo, Miguel Santalices, non dubidou en calificar de “histórica” estiveron presentes na bancada do público Goretti Sanmartín, alcaldesa de Santiago de Compostela e Elisardo Temperán, chanceler do Arcebispado de Santiago como representantes de ambas institucións que formarán parte do Padroado xunto coa Xunta de Galicia e a Mesa do Parlamento. Así como representantes do eido cultural como Victor Freixanes, presidente da Real Academia Galega; Ramón Villares, presidente do Consello da Cultura Galega, así como representantes de cada un dos padroados que honran a memoria das persoas soterradas no Panteón.

Luís Álvarez, voceiro do PSdeG, salientou o “traballo conxunto” realizado polas tres forzas políticas con representación no Parlamento, “sempre con vontade de acordo” para acabar co “limbo institucional” no que se atopaba o espazo. O portavoz dos socialistas galegos sinalou que se trata dunha alianza que ten “relevancia no fondo e na forma pois recoñece ao Panteón a súa verdadeira significación como elemento diferenciador” para o que solicitou un “respaldo continuado no tempo”.

BNG y PSdeG celebran que el acuerdo devuelve al Panteón al ámbito laico y le dará estabilidad

Pola súa parte, Ana Pontón, voceira do BNG, subliñou que Galicia dende hoxe conta cun novo “símbolo nacional ao nivel da bandeira ou do himno”. Neste sentido, a líder nacionalista chamou a “facer o posible por dar a coñecer o Panteón a toda a cidadanía, sobre todo entre os máis novos”. Un traballo para o que se require premura, para unha vez aprobada a Proposición de Lei, “desenvolver o seu contido e dotar ao espazo dos recursos económicos necesarios”. Porén, Pontón agradeceu que hoxe dende a sé da soberanía do pobo galego “devolvémoslle a Rosalía un anaco de todo o que nos deu”, co cambio de nome do espazo que remata coa “invisibilización” feminina.

Finalmente, Pedro Puy, na que foi a súa derradeira intervención no Parlamento de Galicia antes de encamiñar a súa vida política cara o Congreso dos Deputados en Madrid, sinalou que hoxe se trataba un día para mostrar dun xeito “sinceiro”, a nosa “gratitude, agradecemento e a nosa débeda” tanto coas institucións que forman parte deste acordo -nomeadamente Concello e Arcebispado- como coa colaboración política “sobre todo nestes tempos complexos” de todos os grupos parlamentarios. A súa vez parabenizouse, de que o corenta aniversario dos traslados dos restos de Castelao ao Panteón chegarán xa cunha Fundación que xestione o espazo de xeito público.