Raxoi prevé que cheguen esta semana os 12 buses alugados para reforzar a frota

“Os buses alugados comézanse a recibir dende hoxe e incorpóranse ao servizo unha vez que estean entregados o autobús e mais a documentación”. Así o afirmaba o concelleiro de Mobilidade, Xan Duro, durante a rolda de prensa de presentación da Semana Europea da Mobilidade que se celebra dende este sábado 16 até o sábado 23 en Santiago.

Santiago registra problemas en el servicio de autobús relacionados con las averías y el estado de la flota

Unha fin de semana, a vindeira, na que ademais deste evento a capital galega recibe os ministros de Economía e Finanzas da Unión Europea e Latinoamérica e o Caribe (Ecofin), o festival Wos x SON Estrella Galicia, ou as Xornadas por unha Economía Global Xusta e Sostible, entre outras.

Preguntado pola preparación dun dispositivo especial canto a transporte e mobilidade, o concelleiro Xan Duro afirmou que “en principio non está previsto que haxa cortes de ningún tipo, pode habelos puntuais, de moi poucos minutos para o paso dunha caravana de autoridades, pero non agardamos que haxa ningún tipo de problemas”.

É máis, Duro congratulouse de “ter unha cidade o suficientemente viva e activa para que teñamos que pensar se pode haber problemas esta fin de semana”.

O expediente de crédito para alugar os novos autobuses que se agardan nestes días aprobouse en pleno a finais do mes de xullo, contando co voto a favor do goberno local e do Partido Socialista e a abstención do Partido Popular. Preténdese deste xeito complementar a rede de transporte urbano ata que se poida finalizar a licitación do novo contrato do transporte público.

En concreto, trátase de un expediente de crédito extraordinario de 124.993 euros e outro de suplemento de crédito de 387.818 euros. Cando, naquela altura se debateu a mencionada aprobación, a alcaldesa Goretti Sanmartín asegurou que “todo o mundo sabe” que o estado do transporte colectivo na cidade non só “non é óptimo” senón que “é malo”.

“Vimos de momentos nos que non se procedeu a esa renovación da concesión e temos un problema herdado complicado ao que hai que darlle resposta”, sostiña a alcadesa. En reiteradas ocasións, Sanmartín sostivo sobre o asunto do transporte urbano que se trata “dunha prioridade máxima” do goberno local, que avoga por atopar solucións “de forma legal” e “de acordo co que din os servizos xurídicos”.

O Concello de Santiago anulou o pasado 9 de agosto o procedemento de licitación do contrato do transporte público urbano logo de coñecerse que o novo convenio colectivo do sector do transporte de viaxeiros contempla uns incrementos retributivos do 12,2 %, o que supón un aumento de custos que cos actuais pregos non se podían asumir.

Avarías e incidencias constantes

No pleno de debate da aprobación do expediente para alugar máis autobuses, o edil do PP, Adrián Villa, denunciaba, aínda que se amosaba contrario ao procedemento do goberno local, que a situación do transporte urbano na cidade era “insostible, coas autobuses caendo en anacos”.

Unha referencia ás frecuentes avarías e incidencias que dende hai moito tempo aqueixan a rede de transporte público de Santiago. A mediados do mes de xullo, o mal estado da frota, cunha media de dez anos de antigüidade, un dos autocares da liña P3 entre a rúa Valle Inclán, a praza de Galicia e a Susana, quedaba parado por un fallo mecánico á altura da rotonda do Restollal, que une o barrio co da Pontepedriña. Un incidente que obrigou os viaxeiros a agardar un novo vehículo.

Outra situación semellante produciuse no mes de xuño, cando o vehículo que facía a ruta da liña Circular deixou de funcionar á altura da praza Camilo Díaz Valiño. O autobús quedou fóra de servizo no medio da calzada, fronte ao solar da antiga estación de autobuses e deixando no firme do lugar unha grande mancha de aceite.

Na mesma semana deste incidente producíase unha nova avaría no lugar de Laraño. Os veciños da parroquia reportaban a este medio este novo suceso, desta vez, co vehículo que realizaba a ruta da liña P2. Eran as 08.15 horas cando numerosos residentes da zona, que a diario deben desprazarse ao traballo, se cruzaban cun bus urbano varado no arcén, ocupando case a totalidade dun dos carrís.

O vehículo, parado e sinalizado co triángulo de emerxencia para alertar os demais condutores, sufrira, segundo indicaron diversas fontes a este diario unha fuga nos condutos do motor e precisaba de líquido refrixerante.

Unha serie de problemas que se veñen repetindo dende hai máis dun ano e sobre o que o goberno de Xosé Sánchez Bugallo afirmaba que non se puidera licitar o novo contrato por mor da pandemia da covid. Agora é a quenda do bipartito, que atopa con este novo expediente de crédito para o aluguer de vehículos un respiro de cara á aprobación final do novo contrato de autobuses.

Problemas de circulación en Fontiñas pola rodaxe de 'El Caso Asunta'

Os veciños do compostelán barrio de Fontiñas víronse obrigados a afrontar a xornada de onte con unha gran dose de paciencia para circular pola zona, xa que foron numerosos os cortes de tráfico que se produciron en varias rúas a consecuencia da rodaxe da serie ‘El caso Asunta’.

Cortes de tráfico en varias rúas de Santiago debido á rodaxe da serie "El caso Asunta"

Uns cortes que xeraron certo malestar e protestas nalgúns cidadáns, aínda que desde a Polilcía Local confirmábase a este xornal que non se rexistraran problemas significativ