“Reservar a zona vella ao turismo só contribuiría a facer deste espazo un parque temático”

A investigadora Sara María Torres Outón vén de publicar, dentro da Cátedra do Camiño de Santiago e das Peregrinacións, un estudo composto por 200 cuestionarios sobre turismo e comercio en Santiago. O documento, titulado como ‘Análise da oferta da actividade comercial e demanda dos turistas e peregrinas/os en Compostela como final do Camiño’, expón o papel que ten o consumo na distribución comercial en Santiago. Ademais, a investigación pretende poñer especial atención no impacto das peregrinacións que chegan á cidade. Os cuestionarios foron respostados polos comerciantes e hostaleiros, concretamente, os que teñen os seus negocios en puntos estratéxicos para o turismo e os peregrinos.“Na medida en que o ensanche concentra moitos negocios, a maioría das persoas entrevistadas teñen aquí situados os seus locais, seguidos daqueles que están na zona vella”, afirma Torres Outón.

Los peregrinos se defienden: "No somos los culpables de los problemas de Santiago"

Do estudo sácase que “a maioría da clientela son residentes do propio municipio e doutros municipios pertencentes á comarca de Santiago”, comenta a investigadora. Tamén deixa constancia de clientela doutros países, sobre todo “Portugal, Brasil, Italia e Alemaña”. Os entrevistados tamén foron preguntados sobre os tipos de cliente que reciben e prefiren. Sara María Torres comenta que “non existe un perfil de cliente non desexable de maneira clara porque todos son necesarios para manter a vida dos negocios”, en referencia á clientela que reciben os comerciantes e hostaleiros composteláns. Ademais, entre os entrevistados destacan os que pensan na “clientela local como a máis desexable por realizar compras continuamente”, en referencia ao público local que se atopa no municipio durante a maior parte do ano. Tamén destaca a figura da “clientela apreciada”, formada por “familias e estudantes universitarios”.

La Federación de Amigos del Camino busca mejorar la relación entre vecinos y peregrinos

Por outra parte, a tempada turística xa non afecta da mesma maneira a cidade. Concretamente, comerciantes e hostaleiros expresan que “xa non é tan estacional como antes e hai turistas e visitantes ao longo de todo o ano, aínda que a intensidade varía”, destaca Outón. Ademais, os donos de negocios en Santiago móstranse en contra de deixar o casco histórico só para o turismo. A investigadora extrae das respostas que “reservar a zona vella ao turismo só contribuiría a facer deste espazo un parque temático”, en referencia aos testemuños recollidos. Por último, faise fincapé en “Santiago como algo máis que Camiño”.