Vinte anos do Feito a Man: ritmo local e internacional e estrea do escenario Narf en Mazarelos

[object Object]

O presidente da Asociación Cultural (AC) Cidade Vella, Suso Pais, aproveitou a presentación da vixésima edición do festival Feito a Man para reivindicar “coma todos os anos, a música ao vivo nos locais”. Pais lembrou que ano tras ano os membros da AC Cidade Vella asisten a plenos do concello nos que se “aproban iniciativas que a Xunta de Galicia nos paraliza”.

Suso Pais facía así referencia á Lei 10/2017 de espectáculos e actividades recreativas de Galicia. “Cando programamos nos nosos locais”, insistía o presidente de Cidade Vella, “basicamente estámonos arriscando a que nos sancionen, é como un acto prohibido”. A normativa vixente, permítelles aos locais nocturnos un máximo de seis espectáculos ao vivo, de maneira puntual, cada ano, pero dende a asociación teñen a certeza de que “este tipo de concertos e festivais son os que necesita Compostela”. 

“Falamos de masificación e turismo”, reivindica Suso Pais, “pero ao mellor o que había que dicir era ‘non’ aos concertos brutais na praza da Quintana, a eses macroescenarios, fagamos pequenos formatos e acabemos con esas aberracións de 40 ou 50.000 watios rebentando unha praza Patrimonio da Humanidade”. “Imos dar moito a lata”, explicáballe o presidente de Cidade Vella á concelleira Míriam Louzao.

Ánxeles Porto tamén se sumaba á reivindicación de Cidade Vella defendendo “levamos vinte anos regando o talento e as propostas emerxentes” de Santiago, e “isto é o bonito que pode ter unha cidade a nivel cultural, porque iso son as bases”. Neste sentido, Porto facía tamén referencia aos grandes concertos con palabras máis conciliadoras que Suso Pais. “Que logo veña unha superestrela a tocar é un acontecemento, pero é accidental, nós temos que seguir facendo isto porque o festival foi receptor de artistas dunha índole escepcional”.

Pais, que aseveraba que o pleno municipal apoiou as iniciativas de Cidade Vella historicamente, “a única subvención que tivemos déunola no ano 2006 Néstor Rego (BNG)”, solicitaba ao goberno municipal que “sente coa Xunta e modifiquen a Lei de espectáculos, queremos cumprir a normativa pero que se nos deixe facer actuacións”.

A presentación de Feito a Man adoptou na mañá de onte un cariz reivindicativo e evocativo doutra Compostela de anos atrás, con música nas rúas e nos locais nocturnos. “De tocar na cidade vella saíron moitos artistas”, lembraba Angi, que máis alá de falar de Fran Pérez ‘Narf’, participante en varias edicións do festival e protagonista este ano do escenario principal do Feito a Man na praza de Mazarelos, que levará o seu nome, a hostaleira referiuse tamén a primeiras figuras da música galega como Mercedes Peón ou o gaiteiro Xosé Manuel Budiño.

“Os catro anos do goberno municipal do PP”, explicaba Ánxeles Porto, “foron moi duros, o primeiro día do Feito a Man, Conde Roa mandounos a Policía, non nos deixou vender e acordoáronnos”, e así se levaron a cabo os concertos dese día.

A recentemente galardoada coa Alba de Compostela, precisamente polo seu labor como hostaleira nocturna a prol da cultura e membro de Cidade Vella, Ánxeles Porto, defendeu o “compromiso dos locais coa cidade histórica”. “Agora”, incidiu Porto, “a época é moi difícil pero temos a ilusión de ir da man da nova corporación”.

A estas palabras dos organizadores do Feito a Man e representantes da AC Cidade Vella, a concelleira de Capital cultural respondía que dende o grupo de goberno “sempre defendemos a música e as artes ao vivo como elemento clave da nosa riqueza cultural”. E apelou a que os locais recuperen “esa efervescencia que facía de Compostela un lugar tan atractivo e singular e, nese sentido, pularemos para que Xunta de Galicia modifica esa lexislación”.